الجمعة، 15 أبريل 2011

حاله كده


مالى ايه مشكلتى حزين ليه
ليه دايما مضايق ومخنوق وقرفان هل انا انسان نكدى بقيت حاسس انه جوايا كتلة كبيرة اوى من الحزن لدرجة انى مش عارف افرح وساعات بتموتنى بتخلينى انسان مش عايش مجرد انسان لكن مش عايش مش موجود
فاقد الاحساس يااااااااااااااه بقت حياة صعبة اوى معظم وقتى بقى كده بقيت مش بحس مش بعرف احس مفيش حاجة بتأثر فيه الا لو حاجة حزينة اوى وقوية جدا ياااااااادوب بتلمسنى حاجة بسيطة وكأنها بتخترقنى بتخترق الحواجز النفسية اللى مالية كيانى كله
الحواجر اللى اتبنت فيا من غير ما احس عشان تحمينى من الحزن بس بدل ما تحمينى خليتنى تايه عزلتنى عن نفسى مبقتش عارف انا مين بقيت باخد شخصية اى حد واعيش بيها يومين تلاتة وبعدها اقول عليها مش مناسبة
مرة اخد دور المثقف اللى بيقرا ويحضر حاجات مش مفهومة ومرة المتدين الاصولى ومرة المتدين العميق الباحث ومرة المحب لله فى علاقة حب اشبه بالتصوف وشوية الملحد ومرة المستهتر اللى بيضحك واللى صايع واللى بيخرج كل يوم كل ده مش نافع حاسس انه تمثيل حاجات مزيفة كرهتها واتخنقت منها
الحواجز اللى اتبنت جوايا دى منعانى اشوف نفسى زى ما مانعة اى حاجة توصل لاعماق شخصيتى منعانى انا كمان فبقيت مش عارف انا مين
حاجة واحدة بس اللى بتخترقنى خبرة حزن من اللى قلبك يحبها تلمسنى من جوه واتعاطف بشدة مع اللى قدامى كأنى بتعاطف مع نفسى المريضة اللى بدأت اكرهها
نفسى اعرف انا مين يبقى ليا تفكيرى شكلى طريقتى افراااااااحى اللى من القلب وحتى احزانى اللى من القلب
مبقاش حجر لما اتضايق اعيط ولما افرح اضحك مش اسكت لما بسكت معناه انه لسه الحاجز الصلب الغبى ده مانعنى اشوف نفسى من جوه
عارفين انا بقيت بحس بأيه انه انا صنم بقيت واحد من الناس الكبيرة اللى اتفقوا ضمنيا انهم عشان كبار ممنوع يعيشوا كأنسان يفرحوا ويضحكوا لكن مجرد يذاكروا عشان ينجحوا عشان يشتغلوا عشان يتجوزوا عشان يربوا عيال تانى يمروا فى نفس الدايرة المقيتة المقززة
الغريبة هما نفس وشوش الناس الغلابة اللى ماشيين فى شوارع مصر دلوقتى تانيين ضهرهم وبيجروا عشان يلحقوا اتوبيس يتشعبطوا فيه عشان يوفروا ربع جنيه تبص فى وشهم تحسهم ماتوا قبل كده
ايوة ماتوا لما قرروا يعيشوا كده

متخدوش على كلامى شكلى بخرف وكتبت فى 600 الف حاجة

الأربعاء، 13 أبريل 2011


جوايا كلام كتير نفسى اقوله ممكن ابدا باللى بسمعه موسيقى هادية جميلة بالعود(على ما اظن)مرتاح اوى ونفسى اعيط اه اعيط مع انى مرتاح عايز عايط لما ببقى مرتاح بسيب فرصة(للطفل)اللى جوايا يصحى يطلع يقول كلمته اسمع صوته بدل ما انا دايما حابسه وكاتم انفاسه وبقى مش من حقه يقول انا زعلان او فرحان بقى ساكت ميت جوايا طفل تعبان يائس وساكت جوا شاب كبير تايه فى الدنيا وفى نفسه بيزيف الابتسامة اللى مش قادر يبتسمها
دايما مضغوط فى ساقية امتحانات مش بتخلص
كان بيحاول يدور على نفسه مع الاصحاب والخروجات والاجتماعات والخدمات من اى نوع
لكن لقيت انه كله كدب كله جزء من الديكور حسيت ان كل ده مش حقيقى ومش بعبر فيه عن نفسى عشان كده قررت اوقف كل حاجة كل حاجة لا خروجات ولا اصحاب ولااجتماعات ولا اى حاجة موبيلى وقفلته الفايسبوك وتويتر اللى كانوا بيوصلونى باصحابى مش بفتحهم والميل كذلك خدت قرار افضل فى البيت متحركش يادوب الكلية اليتيمة اللى اهملتها ومحتاج اركز فيها شويتين تلاتة بدل تكبير الدماغ اللى انا فيه ده
والصراحة يمكن محستش بفرق كبير او حسيت مش عارف هقول واكتب وانتوا احكموا
حسيت انى مش مضغوط بكمية الخروج والالتزامات اليومية بعد الكلية
بأنى هادى ومستريح وبنام كويس لانى بنام بدرى (مع الاسف كليتى لازم اصحى ليها ستة ونص الصبح)
بأنى مش طور فى ساقية بيجرى ومش ملاحق على اى حاجة ومش بيستفيد
والمهم اللى جاى حسيت بانه مفيش ضغط عليا انى ابتسم يااااااااااااه قد ايه الموضوع ده جميل مش مضطر امثل قدام حد مش مضطر العب شخصية زوق او محترمة مش مضطر انتقى الكلام قبل ما اقوله والبس ماسك مش مضطر اتصل بالعيان والمريض عشان اتصل بيه وانا مش فارق معايا اصلا
 مش مضطر اسلم على فلان واقوله ايه اخبارك وحشتنى وبرضه هو مش فارق معايا واحاول افرحه لو متضايق واشيل همه
 مش مضطر احاول ادخل فى سباق مع نفسى عشان اثبت انى احسن من صاحبى اللى بكلمه وادخل فى مقارنات انا مش قدها واحس بأحتقارى اكتر واكتر (اه صدق انك قريت الكلمة انا واحد بيحتقر نفسه وشايف نفسه قليل جدا وانه زباله  كمان)



 حد هييجى يقولى وايه المشكلة يا ابنى
هقولكوا انى حاسس انى بهرب من الناس مش عايز اتعامل معاهم مرهق جدا بالنسبة ليا التعامل معاهم اه مرهق جدا
لانك لازم تتصرف بطريق معينة وبقيت كل يوم بلبس وش لانى مش عارف انا مين (نفسى الاقى نفسى واعرف انا مين) هل ابعد ولا اقرب مع العلم انه مفيش حاجة اسمها نص نص يا ابعد يا اقرب



ليه الموود الكئيب ده ما انا كنت كويس هرجع تانى واقولكوا انا مبسوط عشان عايز اعيط يااااااه من زمان قوى مجاليش احساس انى ابقى مرتاح كده ومش مضغوط(مع انى طالع عينى فى الامتحانات بس عدت على خير)
حاسس انه الطفل اللى جوايا اللى قلتلكم عليه فاكرينه مبسوط اوى وفى قمة الراحة لمجرد انى سمعته لكن فى نفس الوقت بينا كلام كتير اوى هنقوله مع بعض وشكلنا هنزعل ونتخانق
:D